دم الشهيد

دم الشهيد

دم الشهيد ..
مِسْك الورود
عمره ما كان ضايع هباء
عمره ما كان رايح سُدَىَ
لاكن بيروِّي الأرض .. يزرع لانتماء
وكمان بيتحدَّىَ العِدىَ
يزرع ولاد زي الأسوُد
وقلوبها أجمد م الحديد
وقت الخطر ما يكون شديد
تلقاها بتلبِّي النِدا
دا الدم لو سال م الشهيد
الأرض بالأبطال تجود
أشجار كتيره وطيِّبَه
فيها الثمر مليون ولد
جاهز يموت ويكون شهيد
والدم ينزل من جديد
ويكون وبال ع المُعتدِي
يحفر في بطن الصخر
يكتب ملحمة حب ونضال
بحروف على وش الحَجَر
محفوره بسنون النِصال
وفوقيها ضله من الشجَر
تِفرش أمان
في كل أنحاء المكان
تِخلق عزيمه في الرجال
تقدر تفوت جوَّه المُحال
أما الشهيد فوق في السما
هيشوف ولاده وهُمّا بيهِزوا الجبال
والضحكه ترسِم شفـِّتـُه
يفرح لأن الدم سال
بس انتصَر
وفرَض إرادته ع القدَر
الكون يغِير من ضحكِته
لكن هيفرح للشهيد
إنه استقر ف روضِته
وبيبني فيها بيت جديد
في أحلى حته ف جنـِّته
ماهو ربُّه خلاَّه يوم ما مات
حي وممتش ف رقدِتـُه
كل اللي حاصِل إنه فات
لولادُه أرضـُه ودُنيِّتـُه

*****************